Reno 17 Pro మోడల్‌కు సంబంధించిన లీకైన స్పెసిఫికేషన్లు టెక్ ప్రియుల్లో ఆసక్తి పెంచుతున్నాయి. ఇందులో 200MP ప్రధాన కెమెరా, 7,000mAh బ్యాటరీ, 80W ఫాస్ట్ ఛార్జింగ్ వంటి ఫీచర్లు ఉండొచ్చని సమాచారం. మరోవైపు Oppo Pad Air 6 ట్యాబ్లెట్, Oppo Watch 5 కూడా ఇదే సమయంలో పరిచయం కావచ్చని తెలుస్తోంది. మరి కొత్త సిరీస్‌లో ఎలాంటి ఫీచర్లు ఉండనున్నాయి? భారత్‌లో ఎప్పుడు విడుదల కావచ్చు? నవంబర్‌లో చైనా లాంచ్.. Oppo Reno 17 సిరీస్ కోసం చైనాలో ఇప్పటికే ప్రీ-ఆర్డర్లు ప్రారంభమయ్యాయి. నవంబర్‌లో ఈ ఫోన్లను మార్కెట్లోకి తీసుకురానున్నట్లు కంపెనీ Weibo ద్వారా వెల్లడించింది. ముందస్తుగా ఆర్డర్ చేసే వినియోగదారులకు సర్‌ప్రైజ్ గిఫ్ట్‌లు అందించే అవకాశం ఉంది. అయితే లాంచ్ తేదీ, ధరలను కంపెనీ ఇంకా అధికారికంగా ప్రకటించలేదు.
కంపెనీ విడుదల చేసిన టీజర్‌లో ఫోన్ ముందు భాగం కనిపిస్తోంది. కర్వ్డ్ డిస్‌ప్లే, సన్నని బెజెల్స్, గుండ్రని మూలలతో ఈ ఫోన్ ప్రీమియం లుక్‌ను కలిగి ఉంది. Reno 17 సిరీస్‌తో పాటు Oppo Pad Air 6, Oppo Watch 5 కూడా పరిచయం కావచ్చని అంచనా. ఈ రెండు డివైజ్‌ల పేర్లు కంపెనీ చైనా వెబ్‌సైట్‌లో కనిపించడంతో వాటి లాంచ్‌పై ఆసక్తి పెరిగింది. అయితే వీటి స్పెసిఫికేషన్లు, ధరలపై ఇంకా స్పష్టత లేదు. 7,000mAh బ్యాటరీ! లీకైన సమాచారం ప్రకారం Reno 17 Proలో 6.32 అంగుళాల 1.5K ఫ్లాట్ OLED డిస్‌ప్లే ఉండొచ్చు. MediaTek Dimensity 8550 చిప్‌సెట్‌తో ఈ ఫోన్ పనిచేసే అవకాశం ఉంది. ఫోటోగ్రఫీ కోసం వెనుకవైపు 200MP ప్రధాన కెమెరాతో పాటు రెండు 50MP కెమెరాలను అందించవచ్చని తెలుస్తోంది. సెల్ఫీలు, వీడియో కాల్స్ కోసం ముందు భాగంలో 50MP కెమెరా ఉండొచ్చని సమాచారం.
బ్యాటరీ విషయానికి వస్తే 7,000mAh సామర్థ్యంతో పాటు 80W ఫాస్ట్ ఛార్జింగ్ సపోర్ట్ ఉండొచ్చని లీకులు సూచిస్తున్నాయి. మెటల్ ఫ్రేమ్, IP69 రేటింగ్ కూడా ఇందులో ఉండే అవకాశం ఉంది. భారత్ విషయానికి వస్తే Reno 17, Reno 17c మోడళ్లు మాత్రమే విడుదల కావచ్చని టిప్‌స్టర్ సమాచారం. వీటిలో Snapdragon 7 Gen 4, Dimensity 7300 చిప్‌సెట్లు ఉండొచ్చని అంచనా. Reno 17 5G ఫోన్ CPH2975 మోడల్ నంబర్‌తో థాయ్‌లాండ్ NBTC వెబ్‌సైట్‌లో కనిపించింది. ఈ సిరీస్ Android 17 ఆధారిత ColorOS 17తో వచ్చే అవకాశం ఉంది. భారత్‌లో 2027 జనవరి ప్రారంభంలో విడుదల కావచ్చని తెలుస్తోంది. అయితే ఈ ఫీచర్లు, విడుదల తేదీలపై Oppo నుంచి అధికారిక ప్రకటన రావాల్సి ఉంది.
